Отсекогаш ме фасцинирала димензијата на организациите во која тие реагираат како жив организам. Битието на организацијата е составено од различни витални делови – секој автентичен и посебен, но безвреден без другите. Стратегијата, процесите, ресурсите и луѓето дишат во ист ритам. И заедно се грчат кога некој од нив не функционира.
Оваа димензија не се гледа на прв поглед. Потребни се искуство, чувствителност и многу набљудување за да се препознае оваа длабочина – но кога еднаш ќе ја видиш, никогаш не гледаш на организацијата исто.
По долги години како HR директор, организациски консултант и кариерен советник, научив да ја гледам организацијата и од перспектива на системот, но истовремено и од перспектива на секоја индивидуа.
Верувам дека организацијата и секој поединечен вработен влегуваат во уникатна врска што е многу повеќе од деловен однос. Тоа е двонасочен, жив процес – со пулс што постојано се менува, се мери, се приспособува.
Организацијата поставува рамки, но во тие рамки живее личната приказна на секој човек. А секој човек, со своето присуство, вредности и посветеност, му дава душа и боја на големиот организам.
PRUDENS го основав од тоа верување – дека секоја организација е жив организам со свој уникатен ритам, секој човек во неа посебен, а секој однос вреден внимание. Не постои универзално добро HR решение. Потребна е зрелост да се избере и примени токму она што ќе ѝ помогне токму на таа организација, во тој момент, со тие луѓе.
На таа основа, PRUDENS денес работи како партнер на организации што сакаат да работат поинаку – со повеќе зрелост, повеќе структура и со поквалитетни работни места. Работиме таму каде што HR не е само администратор, туку двигател на усогласување: помеѓу стратегија и култура, структури и луѓе, визионерски цели и секојдневни активности.
Не нудиме готови модели. Ние знаеме дека нема еден лек за секоја состојба во секој организам. Работиме длабински, системски и контекстуално – со анализи, со алатки, со дијалог и со учење. Помагаме организациите да го изберат и применат токму она што им треба – ништо повеќе, ништо помалку.
Ивана
